Jón Hnefill Jakobsson

Ég hef haldið úti bloggsíðu með einum eða öðrum hætti í að verða 4 ár. Með hléum þó. Þannig var ég fyrst á bloggcentral.is, síðan flutti ég mig á Blogger, stoppaði stutt við á moggablogginu, fór svo aftur yfir á Blogger og setti loks upp eigin WordPress bloggsíðu í byrjun þessa árs.

Ástæðurnar fyrir hléunum eru helst þær, að í fyrsta lagi á ég það til að vera alveg einstaklega latur bloggari (sem að útskýrir einstaka viku / mánaðar millibil á milli færslna) og það getur verið tímafrekt að vinna við hverju færslu og setja inn. Fyrra vandamálið er ennþá óleyst að megninu til, en seinna vandamálið hvarf eins og dögg fyrir sólu fyrir um ári síðan.

Þ.e. þegar að ég uppgvötaði Windows Live Writer.

Windows Live Writer er ókeypis hugbúnaður frá Microsoft sem að virkar með öllum helstu bloggkerfum á markaðinum í dag (Blogger, Windows Live Spaces, Sharepoint, WordPress, TypePad etc). Það er tiltölulega einfalt í notkun og býður þess utan upp á viðbótir til þess auka möguleika þess. Mér vitanlega virkar það ekki með neinu af íslenku bloggkerfunum eins og t.d. blog.is, blogcentral.is og blogger.is. Hægt er að tengja fleiri en einn blogg aðgang við forritið sem að gerir það mun auðveldara að halda utan um allt efni ef að þú heldur úti nokkrum síðum samtímis t.d.

Eftir að búið er að sækja forritið og setja það upp, kemur upp skjá valmynd þegar að það er ræst í fyrsta skipti sem að býður þér að tengja blogg aðganginn þinn við forritið. Veljið þá bloggþjónustu sem að ykkur hugnast (í flestum tilvikum Other blog service) og smellið því næst á “Next” til þess að halda áfram uppsetningu.

Sláðu inn notendanafn og aðgangsorð og hakaðu við Remember my password ef að þú vilt ekki þurfa að staðfesta hverja birtingu með aðgangsorði.  Ýttu á Next til þess að klára uppsetningarferlið. Windows Live Writer tengist að því loknu blogg aðganginum þínum og vistar um leið útlit og helstu stillingar.

Eftir að uppsetningunni er lokið fáið þið upp notendaviðmót sem að lítur nokkurn veginn svona út:

Athugið að forritið tekur mið af því hvernig þemastílsniðið er á blogginu ykkar. 

En við skulum byrja á að brjóta niður einstaka þætti í notendaviðmótinu.

Aðal valmynd:

Efst í vinstra horninu er aðal valmyndina og þar fyrir neðan koma flýtimöguleikar fyrir færslur og síður. Einn af sterkustu kostunum við forritið er að þú getur búið til og unnið að nýjum færslum til birtingar á blogginu þínu, en þú getur líka búið til nýjar síður (e. pages) og unnið með þær á alveg sama hátt.

Flýtivalmyndin hefur 4 valkosti; Publish, New, Open og Save draft.

Publish birtir viðkomandi færslu / síðu beint á bloggið þitt. New býr til nýja færslu í forritinu, en með því að ýta á örina við hliðina á geturðu valið að búa til nýja síðu. Open gefur upp möguleika á opna annaðhvort færslu frá blogginu sem að þú hefur þegar samþykkt til birtingar, eða uppkast (sem að getur verið vistað á tölvunni eða á blogg síðunni. Save draft gefur þér kost á að vista uppkast að færslunni í tölvunni þinni, á sjálfum blogg aðganginum eða að vista á blogg aðganginum og vinna áfram með færsluna í blogg stjórnborðinu í vafranum (t.d. TypePad, Blogger, WordPress, Sharepoint etc).

Athugið einnig að flýtileiðirnar (e. keyboard shortcuts), sem að flestar eru listaðar í aðal valmyndinni, eru frábær aðferð til þess að gera alla vinnu með bloggfærslur og/eða síður mun skilvirkari en ella.

Útlitsstjórnun efnis:

Fyrir neðan flýti valmyndina eru valmöguleikar fyrir útlitsstjórnun á færslum og síðum.

Fyrir þau ykkar sem að hafið unnið mikið með Microsoft Office eða Open Office ætti valmyndin að líta nokkuð kunnulega út:

1. Innsetning  (e.paste) efnis ef að þið afritið (e. copy) texta t.d. úr word skjali, frá vefsíðu eða úr pdf fæl (e. clipboard).
2. Ógylding (e. undo).
3. Stjórnun málsgreina og fyrirsagna í texta (e. paragraphs and headings).
4. Feitletrun texta (e. bold).
5. Skáletrun texta (e. italic).
6. Undirstrikun texta (e. underline).
7. Yfirstrikun texta (e. strikethrough).
8. Leturgerð og stjórnun (e. font).
9. Lista stjórnun með númerum (e. numbering).
10. Lista stjórnun með punktum (e. bullets).
11. Tilvitnun (e. block quote).
12. Skipting texta (t.a.m. ef að þið viljið aðeins birta hluta færslunnar með “lesið meira” (e. read more) hlekk neðst (e. split post).
13. Jafnið texta til vinstri (e. align left).
14. Jafnið texta fyrir miðju (e. align center).
15. Jafnið texta til hægri (e. align right).
16. Jafnið texta til hægri og vinstri (e. justified).
17. Stjórnun hlekkja (e. insert hyperlink).
18. Stjórnun mynda (e. insert picture).
19. Stjórnun taflna og einstakra þátt í töflu (e. table).
20. Setja inn einstaka viðbætur (e. insert). [innsk. höf. Þetta er flýtileið fyrir viðbæturnar í hægri dálknum í forritinu. Sjá kaflann “Uppköst, birtar færslur og viðbætur” neðar í þessari færslu fyrir frekari útskýringar].

Fyrirsögn og textasvæði:

Sjálft texta svæðið er nokkuð auðskiljanlegt. Efst seturðu tiltil færslunnar / síðunnar og þar fyrir neðan sjálfan textann.

Eftir því sem að textinn er lengri, hverfur auða svæðið fyrir neðan (gráa svæðið á þessari mynd).

Þetta hjálpar ekki aðeins til við að stjórna betur efnistökum, heldur gefur líka ákveðna mynd af því hversu mikinn texta þú ert að vinna með hverju sinni.

Stjórnun færsluslóða og efnisflokka:

Fyrir neðan textasvæðið eru svo möguleikar til þess að skilgreina betur hvaða slóð (e. slug) þú vilt gefa færslunni (t.d. til þess að auðvelda leitarvélum að finna síðuna þína) og hvaða efnis- og orð flokka (e. categories and tags) þú vilt gefa hverri færslu. Windows Live Writer sækir þá flokka sem að þú hefur þegar sett upp og bætir við stillingarnar.

Þú getur falið svæðið og kallað fram aftur með örini efst í hægra horninu á svæðinu.

Það er hægt að bæta við efnis- og orð flokkum og forritið vistar þá sjálfkrafa á blogg aðganginum þínum.

Þú hefur einnig möguleika á að velja höfund færslu (séu þeir fleiri en einn á viðkomandi blogg síðu) og varið einstaka færslur / síður með notendanafni og aðgansorði ef að þú vilt t.d. takmarka aðgang að þeim.

Forritið býður líka upp á möguleika að setja tíma á færslu birtingu, sem að þýðir að færslan / síðan mun einungis verða sýnileg eftir þann tíma.

Efst til vinstri hefurðu svo Edit, Preview og Source þar sem að þú getur valið á milli þess að vinna með texta og útlit beint í notendaviðmótinu (Edit), skoða hvernig færslan / síðan kemur út á síðunni þinni (Preview) og fyrir lengra komna er hægt að vinna og bæta við HTML og CSS kóðann (Source).

Uppköst, birtar færslur og viðbætur:

Það er ein viðbót sem að mig langar að fara aðeins nánar út í. Picture.

Picture viðbótin í forritinu gerir alla vinnu með myndir fyrir færslur / síður mikið einfaldari og skilvirkari. T.d. er hægt að bæta við einföldum effectum, vinna með contrast, setja inn watermark, hreyfa þær til (e. tilt), breyta stærðar hlutföllum og skera (e. crop) beint inni í viðbótinni án þess að þurfa að opna annað myndvinnslu forrit til þess.

Í hnotskurn:

• Forritið þykir frekar létt og einfalt í notkun.
• Það er ókeypis en virkar enn sem komið er einungis á Windows XP, Windows Vista og Windows 7.
• Hægt er að tengja fleiri en einn bloggaðgang við forritið og vinna með efni hverja síðu fyrir sig, eða birta sömu færsluna á fleiri en einni síðu.
• Það virkar ekki með neinum íslenskum bloggþjónustum eftir því sem að ég kemst næst.
• Ef að færslur / síður eru vistaðar sem uppkast á sjálfu blogginu, getur hver sem að líka hefur Windows Live Writer og aðgang að sama bloggi, sótt uppkastið og unnið með hjá sér.
• Það gerir samvinnu fyrir t.d. verkefna vinnu mun auðveldari, þar eð t.d. blogg síða fyrir hópinn ykkar gæti auðveldað samvinnu og rannsóknar vinnu sem og leyft kennaranum ykkar að fylgjast með.
• Á þessari síðu eru ágætis leiðbeiningar fyrir Windows Live Writer fyrir þá sem að vilja vita meira.
• Windows Live Writer forritið er hægt að sækja hérna.
• Allar viðbætur er hægt að sækja hérna og þarf að setja upp sérstaklega. Windows Live Writer getur ekki sett þær upp sjálfkrafa.

(Fyrsta greinin af þremur tileinkuð Windows 7 stýrikerfinu frá Microsoft og nýjum / væntanlegum hugbúnaðarlausnum fyrirtækisins og fjallar um ferlið sem að leiddi til þróunar Windows 7)

Frá Longhorn til Vista til Jerry Seinfeld

Hugbúnaðarrisinn Microsoft hefur í gegnum árin sætt mikilli gagnrýni fyrir að hlusta ekki á notendur sína, hunsa breyttar félags-  og efnahagslegar aðstæður og taka ekki mark á breyttri notendahegðun við þróun og útgáfu á hugbúnaði sínum og stýrikerfum. Þessi afstaða fyrirtækisins náði ákveðnu hámarki með útgáfu Windows Vista árið 2007.

Saga Vista var sorgarsaga frá upphafi til enda; mörkuð misgáfulegri ákvarðanatöku, slæmri markaðssetningu, ennþá verra upplýsingaflæði og, af því er virðist, hálf handahófskenndu þróunarferli. Vinnan við stýrikerfið hófst skömmu eftir útgáfu Windows XP árið 2001 og upphaflega stóð til að byggja grunninn að kerfinu á Windows 2000 Server tækninni, en í miðjum klíðum var horfið frá þeirri hugmynd og byrjað upp á nýtt á vinnu ferlinu með XP sem grunntæknina. Ástæðan var sögð ný tækni, Windows Foundation, sem átti að byggja inn í grunninn á Vista og hefði ekki verið möguleg annars. Vinnuheitið á nýja stýrikerfinu fékk nafnið Longhorn, í höfuðið á uppáhalds bar þeirra sem komu að vinnunni við það (sem að aftur segir kannski eitthvað um hvernig staðið var allri vinnunni). Útgáfudagur var upprunalega áætlður árið 2005, en var frestað aftur og aftur vegna tæknilegra örðugleika, og að lokum neyddust Microsoft til þess að strípa n0tkunarmöguleika stýrikerfisins meira og meira niður þegar að í ljós kom að tæknin og harðbúnaðurinn sem að það notaðist við, réðu ekki við allar stórkostlegu viðbæturnar sem að áttu að verða partur af því. Að lokum var meira að segja Windows Foundation, undirstaðan á bakvið allar helstu ákvarðanatökur við vinnuferlið á stýrikerfinu hingað til, strípað út. Við þetta bættust svo ruglingslegar yfirlýsingar um útgáfudaga, hvaða breytingar stæðu til og fjölmargir lekar á mismunandi þróunarstigum. Fyrstu prófanir á Vista hófust loks á vormánuðum 2006 og það kom í verslanir seinna í byrjun árs 2007 ¹.

Ég var einn þeirra sem að fékk beta invite á fyrstu útgáfuna af Vista frá Microsoft á sínum tíma og setti kerfið upp á eina af vélunum mínum. Ef að ykkur líkaði illa við Vista og UAC (User Access Control) valmöguleikan, þá getið þið rétt ímyndað ykkur martröðina sem að við fyrstu notendurnir þurftum að glíma við. Þú gast ekki slegið UAC af eða á (Microsoft ætluðu s.s. upprunalega að hafa það innbyggðan notkunarmöguleika sem að aðeins sjálfur admin accountinn gat tekið af), Windows sidebarinn tók allt að 20% af vinnsluminninu, sjálft notendaviðmótið (themes)  gat tekið 5 – 10% (eftir því hvað þú valdir að sérsníða það mikið), megnið af helstu forritunum á markaðinum, sem og eigin hugbúnaður Microsoft virkuðu ekki með stýrikerfinu, það studdi ekki stóran part af harðbúnaðinum á þeim tíma og svo mætti lengi telja. Microsoft hlustuðu þó á eitthvað af kvörtunum beta notenda sinna og betrumbættu Vista að hluta til áður en þeir gáfu það út.

Næstu mistök Microsoft í öllu ferlinu fólust í markaðssetningu og eftirfylgdinni á Vista. Windows XP kom t.d. í tveimur útgáfum; Home og Professional. Munurinn á þeim var nokkuð skýr: Home var ætlað meðal tölvunotendanum, sem að ekki þurfti á flóknari netkerfis stillingum Professional útgáfunnar að halda. Vista, aftur á móti, bauð upp á litlar 4 útgáfur;  Home Basic, Home Premium, Business og Ultimate. Munurinn á útgáfunum ? Jú innbyggð forrit frá Microsoft eins og Media Center ásamt backup og protection möguleikum…

Á haustmánuðum 2007 jukust vandræði Microsoft enn frekar þegar að fyrirtækið tapaði málarekstri gegn Evrópusambandinu sem að staðið hafði nánast óslitið síðan 2003 og snérist um markaðsmisnotkun þeirra á hugbúnaði sem að það dreifði sem hluta af Windows stýrikerfinu ².

Í ofanálag uppgvötuðust fljótlega öryggisgallar í Vista sem að gleymst hafði að gera ráð fyrir, stýrikerfið hlaut almennt slæma umfjöllun, Microsoft stóð í málferlum í Bandaríkjunum og sætti vaxandi gagnrýni bæði heima fyrir og erlendis. Sem svar við öllu þess neikvæða umtali ákváðu Microsoft að blása til sóknar með sennilega einni misheppnuðustu auglýsingaherferð fyrr og síðar, þar sem að engin annar en Jerry Seinfeld átti að lappa upp á laskað orðspor Microsoft með samræðulist sinni ásamt Bill Gates, stofnanda Microsoft ³. Botninn tók svo úr þegar að Intel, einn stærstu samstarfsaðili Microsoft, ákváðu að einungis hluti af tölvubúnaði þeirra yrði uppfærður á hið nýja stýrikerfi.

Þetta var á haustmánuðum 2008 og ofan á mikla gagnrýni, misheppnaða auglýsingaherferð og tapaðan málarekstur, stóð Microsoft frammi fyrir versnandi afkomu sökum efnhagsþrenginganna.

Næsta færsla (væntanleg): Windows 7 & breytt ímynd Microsoft.

¹: Windows Vista – Wikipedia

²: EU vs. Microsoft Competiton Case – Wikipedia

³: Jerry Seinfeld And Bill Gates’ Microsoft Ads Being Pulled – Huffingtonpost

Fjölmiðlar vestanhafs hafa fjallað mikið um ræðu Barack Obama til Bandarískra skólabarna sem að hann hélt í dag.

Obama tilkynnti fyrir nokkrum vikum að hann myndi flytja ávarp til bandarískra skólabarna og voru skólayfirvöld hvött til þess að sýna ræðuna beint í skólum. Mikil umræða skapaðist í kjölfarið um hvort að réttlætanlegt væri að menntastofnanir tækju beinan þátt í innanríkis pólitík á þennan hátt, en talsmenn hvíta hússins bentu á móti á að ræðan væri ekki um stefnumál forsetans í menntamálum, heldur frekar ávarp og hugleiðingar sem að ættu erindi til skólabarna um gjörvöll Bandaríkin.

Sandra Abrevaya:

“This isn’t a policy speech,” said Sandra Abrevaya, a spokeswoman for the Department of Education. “It’s designed to encourage kids to stay in school. The choice on whether to show the speech to students is entirely in the hands of each school. This is absolutely voluntary.”

Til þess að bregðast við gagnrýni og gefa skólayfirvöldum betri yfirsýn yfir ræðu forsetans, birti hvíta húsið transcript af ræðunni á heimasíðu sinni. Ákvörðunin kemur í sjálfu sér ekki á óvart þar sem að heimasíða hvíta hússins býður upp bein samskipti án aðkomu fjölmiðla.

Neðst í þessari færslu er svo að finna ræðu forsetans í heild sinni, þökk sé Scribd.com

Ég, ásamt fleirum,  hjó þó sérstaklega eftir því að ræðunni ber Obama mikið lof á stofnedur Twitter, Facebook og Google og segir þá frumkvöðla sem að börn ættu að taka sér til fyrirmyndar:

“The story of America isn’t about people who quit when things got tough…It’s the story of students who sat where you sit 250 years ago, and went on to wage a revolution and found this nation. Students who sat where you sit 75 years ago who overcame a Depression and won a world war; who fought for civil rights and put a man on the moon. Students who sat where you sit 20 years ago who founded Google, Twitter and Facebook and changed the way we communicate with each other.”

En á meðan að Sergey Brin, Larry Page, Mark Zuckerberg, Biz Stone og Ev Williams eru hylltir sem frumkvöðlar nýrrar kynslóðar, er að finna ansi beitta sneið á Microsoft vs. Apple í nótum við ræðuna:

“Students are encouraged to invent the “next iPhone” and not to “spend every waking hour in front of the TV or with that Xbox”

Ouch.

Hér er svo ræða forsetans:

President Obama’s Address to American Schoolchildren, 8 September 2009

Fyrir rúmlega 11 árum eignaðist ég minn fyrsta farsíma; sá var af gerðinni Ericsson A1018 ef að ég man rétt (þetta var áður en að Sony og Ericsson sameinuðu farsíma framleiðslu línurnar hjá sér árið 2001). Meðal helstu eiginleika hans var loftnet sem að þú gast skrúfað af og á eftir hentugleikum auk 10 hringitóna sem að komu með símanum (þar sem að stefið úr Stjána Bláa gnæfði yfir hina í vinsældum).

Þetta var jú fyrir tíma myndavélasíma, Facebook, Twitter, WAP, MMS, tölvupósts í farsímum og GPS. Síminn minnti einna helst á talstöð og þyngdin var eftir því. Ég  fékk auk þess ófáar háðsglósurnar á þessum árum og var margoft spurður hvers vegna í ósköpunum ég þyrfti á svona apparati að halda; Hver ætti svo sem að vilja ná í mann hvenær sem væri og hvað í ósköpunum svona farsíma apparat hefði framyfir gömlu góðu heimasímanna. Needless to say þá er ég ekki spurður að þessu í dag.

Á þessum 11 árum sem að síðan eru liðin, hefur mikið vatn runnið til sjávar í framleiðslu, hönnun og notkunarmöguleikum. Sem betur fer kannski. Farsímar í dag eru ekki aðeins fyrirferðarminni, öruggari og þægilegri í notkun heldur hafa þeir þróast í margmiðlunartæki (e. multimedia device) sem að gera þér kleift að halda utan um öll þín daglegu samskipti, upplýsingar og afþreygingarefni¹. Og þróunin stoppar ekki þar. 3G, qwerty lyklaborð, snertiskjáir, myndvarpar og gps staðsetningartæki eru aðeins örfá dæmi um tækninýjungar sem að eru að slíta barnskónum eða handan við sjóndeildar hringinn.

Sjálfur hef ég átt ógrynnin öll af farsímum í gegnum tíðina; svo marga reyndar að ég hef ekki tölu á þeim lengur. Sá nýjasti í röðinni er Sony Ericsson w995 sem að leysir þar með af Nokia E66 símann minn.

Ég ákvað af þessu tilefni að taka saman lista yfir 10 forrit og vefþjónustur fyrir farsíma sem að eru vel þess virði að skoða nánar. Nánari upplýsingar er að finna á síðunum sjálfum.

1. ZYB. ZYB er vefþjónusta og farsíma forrit sem að gerir þér klefit að vista alla tengiliði úr símaskránni þinni á netinu og þar með að hafa aðgang að upplýsingunum hvar og hvenær sem er. Þú getur líka séð allar nýjustu Facebook stöðu uppfærslurnar og hvar aðrir ZYB notendur eru staðsettir á korti.
2. Tiny Twitter. Fyrir ykkur sem að notið Twitter mikið er hér komið lítið forrit sem að keyrir á flestum tegundum farsíma og gerir ykkur kleift að uppfæra Twitter stöðuna hjá ykkur fljótt og örugglega.
3. YouTube Mobile Application. Forrit til þess að sækja og horfa á myndbönd frá YouTube myndbands hýsingar síðunni.
4. Google Mail. Forrit til þess auðvelda aðgengi að Google tölvupóst þjónustunni. Býður upp á samtals yfirsýn til þess að lesa tölvupósta betur á minni skjám, spam filterar sjá einungis mikilvæg skilaboð on the go, yfirsýn yfir vistaða tölvupósta (drafts) og viðhengi.
5. Goosync.com. Forrit til þess að synca Google Calendar við farsímann þinn. Auðveldar til muna daglega skipulagningu ef að þú notar Google Calendar til þess að halda utan um fundi, mannamót, verkefnavinnu o.s.fr.
6. Zannel.com. Síða sem að býður notendum upp á að uploada ljósmyndum, myndböndum og tónlist og senda á Twitter, Facebook, MySpace, Flickr eða á WordPress og Blogger blogg þjónusturnar.
7. Facebook Mobile. Forrit sem að auðveldar þér til muna að uppfæra Facebook stöðu uppfærslur í gegnum farsímann. Forritið býður m.a. upp á að svara skilaboðum, öðrum stöðu uppfærslum og skrifa á veggi hjá fólki á vinalistanum þínum. Að auki geturðu tekið ljósmyndir á símann þinn og uploadað á Facebook síðuna þína.
8. Free Conference Calls. Þetta forrit gerir nákvæmlega það sem að nafnið gefur til kynna; það gefur notendum möguleika á að hringja ókeypis ráðstefnu símtöl í gegnum Facebook síðuna. Þessi símtöl er hægt að hringja hvar svo sem að þú hefur aðgang að internetinu í gegnum farsímann þinn. Auðvelfar til muna verkefnavinnu í hópnum hjá þér t.a.m. í fjarnámi eða ef að þú ert að leitast eftir ódýrari leiðum til þess að skipuleggja fjarfundi.
9. LiteFeeds.com. Forrit fyrir farsímann þinn sem að syncar og les RSS feedin þín við sambærilegar netþjónustusíður.
10. Mobiseer.com. Síða sem að heldur yfirlit yfir vefsíður sem að keyra vel á farsímum, merktu þær fyrir seinni tíma notkun og byggðu upp þína eigin vefsíðu með öllum uppáhalds linkunum þínum fyrir auðveldara aðgengi. Með bestu bookmark þjónustum fyrir farsíma sem að finnast á markaðinum í dag.

¹· Með afþreygingarefni á ég við ljósmyndir, kvikmyndir, tónlist og flest allt það efni sem að hægt er að vista á stafrænu formi.

Eitt af því fyrsta sem að ég lærði í margmiðlunarhönnunni var að velja réttu tólin til þess að vinna með. Ég skipti t.d. fljótlega yfir í Firefox vafrann frá Mozilla í stað Internet Explorer og hef haldið mig við það val nánast alla tíð síðan. Þetta var líka á þeim tíma þegar að Internet Explorer 6 frá réði lögum og lofum á internetinu, MySpace var svalasta heimasíðan af þeim öllum og þú þurftir sérstakan boðslykil til þess að skrá þig fyrir gmail aðgangi.

En þar sem að það getur verið bæði flókið og ruglingslegt að finna út hvaða vafri hentar best ákvað ég að setja saman smá lista sem að tekur vonandi á helstu kostum og göllum mest notuðu vafranna fyrir Windows stýrikerfið.

Að gefnu tilefni: Ég mun ekki fjalla um Internet Explorer 6 eða eldri útgáfur í þessari upptalningu.  Útgáfa 7 leit dagsins ljós árið 2006 og útgáfa 8 er sem stendur í RC 1. Ef að þú ert ennþá með Internet Explorer 6 eða fyrirrennara hans í notkun er hægt að ná í nýrri útgáfur hérna.

	Firefox er sennilega þekktasti vafrinn á markaðinum í dag fyrir utan Internet Explorer.  Allur sá fjöldi viðbóta sem að hægt er að fá gerir hann án nokkurs vafa að sveigjanlegasta vafra sem að völ er á og Mozilla hefur auk þess lagt mikið kapp á að gera vafrann bæði hraðvirkari og stöðugari; þannig hefur vinnslugetan aukist með hverri útgáfu og minnisnotkunin farið stöðugt niður á við.  (Þegar að þetta er skrifað er útgáfa 3.1 í beta prófun og skv. bráðabirgðaniðurstöðu virðist hann ætla langt fram úr fyrri útgáfum í hraða). Kostir: Hraðvirkur, viðbæturnar gera hann að sveigjanlegasta vafranum á markaðinum, notast við færri kerfis ferla heldur en flesti aðrir vafrar, innbyggður stuðningur við grunn myndvinnslu, fliparnir (tabs) gera það að verkum að þú þarft ekki stöðugt að vera að opna nýja glugga (minnkar álagið á innra minni tölvunnar) og öryggis gallar eru yfirleitt lagfærðir um leið og þeir koma fram. Gallar: Of margir valmöguleikar geta valdið misskilningi, ef að einn flipi (tabs) hrynur þá hrynja allir, til þess að loka fyrir aðgengi að persónu upplýsingum þarf viðbót við vafrann, of margar viðbætur gera vafrann bæði þungan og seinan og sumar viðbæturnar geta opnað fyrir öryggisleka inn á stýrikerfi notandans. Hérna er hægt að sækja Firefox og hérna er listi yfir viðbætur.
	Flock er tiltölulega nýr á markaðinum og einkum beint að notendum sem að lifa á vefnum. Öðru nafni internet fíklum. Hann er byggður á sama grunni og Firefox og útgáfa 2 er sem stendur í beta.  Flock býður upp á innbyggðan stuðning við öll helstu tengslanetin ásamt YouTube og Flickr. Kostir: innbyggður blogg editor, hefur besta RSS stuðninginn af öllum vöfrunum á markaðinum, Tengslanetin uppfærast sjálfvirkt í hliðargugganum, upphlað á síður eins og YouTube og Flickr er innbyggt í vafrann, styður sjálfvirkt við tölvupóst þjónustu eins og gmail, þú getur vistað texta og myndir af vefnum á spjaldi í hliðarglugganum til þess nota seinna t.d. í bloggfærslum og hann styður flestar þær viðbætur sem að þróaðar eru fyrir Firefox. Gallar: Viðbæturnar geta tekið of mikið pláss á skjánum, of margar viðbætur geta valdið truflunum og hann er hægari í vinnslu en t.d. Firefox. Hérna er hægt að sækja Flock.
	Chrome frá Google er spútnik vafrinn á vefnum í dag. Hann hefur minna af valmöguleikum en flestir hinna vafranna en bætir það margfalt upp með hraða og stöðugleika. Leitarmöguleikar vafrans eru framar öllum hinum og hann gerir það mögulegt að leita eftir texta í geymdum upplýsingum þó að tölvan sé ekki nettengd. Hann hefur oft við nefndur sem besti vafrinn fyrir þá sem að fást við hvers konar rannsóknarvinnu og þurfa auðvelt aðgengi að upplýsingum. Kostir: Hraður og einfaldur, stöðugur í vinnslu, hægt að loka fyrir aðgang að persónu upplýsingum og hægt að nota vefhugbúnað í gegnum vafrann þegar að hann er ekki nettengdur. Gallar: Ekki möguleika á að loka fyrir auglýsingar, mjög takmarkaðir valmöguleikar, getur verið erfitt að finna út úr bókarmerkjum og hann getur tekið upp mikið vinnsluminni. Hérna er hægt að sækja Google Chrome.
	Opera vafrinn hefur tekið miklum breytingum hin síðari ár.  Hann þykir henta vel á gamlar tölvur sem að búa ekki yfir jafn öflugum harðbúnaði og tíðkast í dag og þrátt fyrir smæð er Opera sá vafri sem fylgir vef stöðlum best af öllum vöfrunum.  Hann er einnig fáanlegur fyrir fleiri stýrikerfi en flestir hinna vafranna, hann býður upp á bestu samhæfinguna af þeim vöfrum sem að eru í gangi í dag og Opera varð fyrsta fyrirtækið til þess að þróa sérstaka útgáfu af vafranum sínum fyrir farsíma (og það áður en að markaðurinn sá fyrir þá sprengingu sem að varð í internet notkun á farsímum). Kostir: Hægir ekki á vinnsluminni tölvunnar óháð því hvort að hún keyri á gömlum harðbúnaði eða ekki, góður leitarmöguleika og vistun fyrri leita í vafranum og býður upp á samhæfingu allra stillinga frá einni tölvu til annarar. Gallar: Ekki að hægt að blokka auglýsingar, ekki beint hraðvirkasti vafrinn á markaðinum í dag og ekki hægt að loka fyrir aðgang að persónu upplýsingum. Hérna er hægt að sækja Opera.
	Internet Explorer vafrinn frá Microsoft er sennilega þekktasti vafrinn sem að völ er á.  Hann fylgir með hverju einusta eintaki af Windows stýrikerfinu og lengi vel notaði Microsoft hann sem skilyrði til þess að geta uppfært Windows.  Sem stendur er enn í gangi málshöfðun á vegum Evrópusambandsins á hendur Microsoft fyrir misnota samkeppnisaðstöðu sína þar sem bæði Internet Explorer og Windows Media Player koma fyrirfram uppsett á Windows.  Lengi vel þrjóskuðust Microsoft við að uppfæra Internet Exploer 6 en létu undan þrýstingi árið 2006 með útgáfu IE 7. Sem stendur er nýjasta útgáfan, IE 8, enn í beta prófun. Kostir: Innbyggður stuðningur við flipa (tabbed browsing), betri vörn gagnvart öryggislekum, góður bókamerkja stuðningur, styður RSS feeds og býður upp á innbyggða vörn fyrir notenda upplýsingar. Gallar: IE7 Virkar aðeins á Windows XP SP2 og nýrri útgáfum sem stendur, við uppsetningu vafrans þarf að endurræsa stýrikerfið, er að endurnota of mikið af grunnkóðanum á bakvið IE6, styður ekki við alla vef staðla, skortir mikið af notkunarmöguleikunum sem að Firefox og Opera bjóða upp á og heldur enn í Microsoft arfleiðina við seinagang á öryggis uppfærslum. Hérna er hægt að sækja Internet Explorer 7.
	Apple komu mörgum á óvart þegar að þeir tilkynntu árið 2007 að þeir hygðust þróa útgáfu af Safari vafranum fyrir Windows stýrikerfið. Þessi strategía fyrirtækisins að fara inn á annars harðann markað Windows hugbúnaðar heppnaðist þó með ágætum eftir hálf brösulega byrjun.  Vafrinn hefur aukið markaðshlutdeild sína um 2.3 % á milli mánaða frá janúar 2007 til janúar 2009. Kostir: Innbyggður RSS lesari, auðvelt að senda heilu vefsíðurnar eða hluta þeirra með tölvupósti, virkar á iPhone, Mac og Windows, les PDF skjöl hratt og vel og og nýjasta útgáfan (nr. 4) gerir Safari með hraðvirkustu vöfrunum á markaðinum í dag. Gallar: Getur ekki breytt leitarvélinni frá Google, ekki hægt að fjarlæga leitar boxið þar sem að það er innbyggt inn í vefslóðar boxið, ekki mögulegt að slá animated .gif myndir frá, gefur ekki sérstaklega til kynna hvort að þú hefur sett RSS feed í áskrift eða ekki, styður ekki favicons í flipum (tabs), erfitt að slá Flash af eða á og hann styður ekki við grunn virkni myndvinnslu. Hérna er hægt að sækja Safari fyrir Windows.

Þessi listi er þó langt frá því að vera tæmandi en gefur lesendum vonandi einhverja hugmynd um hvaða valkostir eru fyrir hendi.

Ég er hættur að telja þau skipti sem að ég hef reynt að halda úti bloggsíðu.  Það byrjaði fyrst árið 2005 (og þá meira í tengslum við námið frekar en hitt), fljótlega eftir það færði ég mig yfir á blogcentral í smá tíma, því næst yfir á blogspot, svo stoppaði ég stutt við á Bloggþjónustu Morgunblaðsins og loks fór ég aftur á blogspot en nennti því svo ekki lengur og hef verið “heimilislaus” í netheimum síðan 2007.

Á þessu ári uppgvötaði ég hins vegar undirlén, marghátta gagnagrunnstengingar, Windows Live Writer, WordPress 2.7.1 og plugins.  Á mannamáli myndi það þýða einfaldari aðferð til að uppfæra bæði bloggið og heimasíðuna og halda utan um alla “vinnu utan vinnu” verkefna. Kaldhæðnin í seinustu setningu er sú að ég er að leita að vinnu þessa dagana og sé mér farborða sem freelancer í millitíðinni.

Verandi trúr faginu, þá er heimasíðan ennþá í vinnslu og, af fenginni reynslu, kemst hún í loftið “fljótlega.” Það er jafnframt vinsælasta dagsetning margmiðlunarhönnuða við skil á verkefnum næst á eftir “seinna” og “von bráðar.”

Ég náði allavega að setja upp þessa síðu.  Njótið á meðan að það varir.